El día en Gigia, (nomada asina polos romanos), acóyenos ensin agua, pero'l cielu
taba encapotáu, anunciaba que volvería llover, asina qu'aniciamos rápido
la sienda cicloturista y camín del muellín, dexamos atrás la playa de Poniente.
Pasamos al llau de la casa natal de Xovellanos y desde la Ilesia de San Pedro,
baxamos a la ablucante concha de la playa San Llorenzo. Como no...., parada na
Escalerona pa la semeya, y lluego a facer los 1.500 metros pela arena fasta'l
riu Piles.
Pela oriella del Piles, colamos en busca del arroyu Deva ó Peñafrancia, onde a
les orielles ta la meyor muestra de viesca de ribera. De xemes en cuando, parada
pa xuntanos. Vamos per Cabueñes, a lo
lloñe vemos la Llaboral, pasamos per paixaxes comu la Carbayera del Tragamón, pa
lluéu empobinamos al so nacimientu nel
güeyu de Deva, que nun ye otra cosa qu'una surgencia subterránea que vién del cercanu valle de Riosecu.
Agora vamos bordiando la muria de la magnífica finca de los condes de Revillagigedo (Palaciu del Marqués de San Esteban del Mar),
dientro la parroquia de Deva, onde topetamos con el llavaderu, la fonte y el puentín,
llenos de sabor tradicional, y la capiella de la Virxen de Peña de Francia (sieglu XVII), que fói
antiguo panteón de los marqueses.
Agora vamos pa La Olla. Esti pasu de 329 m. de altura, une'l camín del monte
Deva cola Llomba (Villaviciosa). Equí hebo una venta nel sieglu XVIII y agora
faen descensos de Btt en competición. Trevesamos un ocalital y ..... ¿Quién dixo
mieu? Cago na mar, a baxar pela pista de descensu, onde hai qu'echa-y narices. Toos xuntos
cerca del camping, continuamos la ruta pa Santuriu.
Nun queda muncho p'aportar a Caldones, y tenemos al "Presi"con poblemas nel frenu de discu. Alcordose de Rubén un pocu,
y comu'l "mecánicu" tenémoslu un poco xodíu del güesu, pos allá va Armandín p'arreglar el poblema.
El comentariu ye'l Rufo, comu anda'l tío, agora comu dexó el fumeque, anda tou
azotáu, tá que se sal.
La parada en Caldones fói sólo pa ver la Ilesia de San Vicente y la casona señorial de los Vixil de Quiñones (1637).
Güey ye solar de la familia Rato Rguez.,condes de Duquesne.
Vamos mal de tiempu, asina qu'apurando pa Llavandera. Aportamos al pueblu onde hai un xigantescu roble xunto a la Ilesia,
ye'l carbayón bicentenariu de Llavandera, catalogáu comu Monumentu Natural. Al llau del carbayu, ta la escuela
onde exerció de mayestru el famosu poeta Asturianu Pepín de Pría. Enfrente
tenemos el llagar de Trabanco, que aprovecha ún de los túneles, comu bodega, que
dexó la Viona.
Ya vemos les antenes del Picu El Sol (439 m.), asina que ensin decir pallabra,
empobinamos sin pensalo dos veces. Ponen tal enfotu en coronalu los "aguilillas", que tién que Jose
llamalos pol movil, pos pasaronse de curva. Cuando llegamos al cume, un gotu
sudor esbaria-nos pela frente. Comu ya tenemos fame y paez que se
pon a orbayar, la parada ye breve, ponemos el chubasqueru y baxamos a to trapu pa la Camocha, onde vamos
a parar pa comer.
La xintá fói buena y hebo hasta chupito de miel.
Aínda quedaba regresar a Mieres, entóncenes colamos pela senda verde en
direición a la estación de Xove. Ensín que nos diéremos cuenta, dábemos por terminá la ruta.
Aportaba'l tren, ta llueu Jose, vémonos en Mieres.
